Sunday, July 15, 2012

பயணக் குறிப்புகள் - Brussels, பெல்ஜியம் - 2



Atomium
நாங்கள் முதலில் இறங்கிய இடம் மதிய உணவிற்காக. என் கணவர், குழந்தைகளுக்காக சிக்கன்பர்கரும், பிரெஞ்சுப்ரைசும், சுதாமன் மற்றும் எனக்காக வெஜ்பர்கரும் அநியாய விலைக்கு வாங்கிச் சாப்பிட்டோம்! அமெரிக்காவில், பர்கர்,fries,சோடா எல்லாம் பெரிய சைசில் குறைந்த விலையில் கிடைக்கும், ஆனால், ஐரோப்பாவில் எல்லாமே சிறிய சைசில் தான் கிடைக்கிறது. விலையும் மிக அதிகம். இது எதிர்பார்த்தது தான், இருந்தாலும் கொள்ளை விலையாய் இருக்கிறதே என்று நினைக்கத் தான் தோன்றியது. கை துடைக்கும் டிஷ்ஷு பேப்பர் கேட்டால், US-ல், மொத்தமாக தூக்கிக் கொடுப்பார்கள் அல்லது எவ்வளவு வேண்டுமானாலும் எடுத்துக் கொள்ளும் வகையில் வெளியே வைத்திருப்பார்கள். ஆனால், இங்கே கேட்டாலும் ஒன்றோ, இரண்டோ தான் கொடுக்கிறார்கள், அதுவும் சிறிய சைசில் தான்என் பையனும், சாப்பிட்டு விட்டு, முகம்,கை கழுவ பாத்ரூம் பக்கம் போனவன், அரண்டு ஓடி வந்து daddy they are asking 1euro to use the restroom என்று ஷாக் அடித்தவன் போல் கூற, நாங்களும் ஷாக்ஆகிப் போனதென்னவோ உண்மை தான். அமெரிக்காவில் இப்படி ஒன்றை கேள்விப்படாததால், சிறிது நேரம் ஆகியது இந்த விஷயத்தை ஜீரணிப்பதற்கு!
Mini Europe

ஒரு வழியாக சாப்பிட்டு முடித்து விட்டு, அருகிலிருக்கும் மினிஈரோப் என்ற அருங்காட்சியகத்திற்கு சென்றோம். ஐரோப்பா நாடுகள் அனைத்திலும் உள்ள பிரபலமான இடங்களை அதே மாதிரி சிறு,சிறு வடிவங்களில் மிக அழகாக உருவாக்கி இருந்தார்கள். வெனிசில் இருப்பது போல் படகுகளும், வீடுகளும், பாரிஸில் இருப்பது போல் ஐபில்டவரும், ரோமில் இருப்பது போல் பிசா டவரும், சர்ச்சுகளும், லண்டன் தேம்ஸ் ஆறும், பார்லிமென்ட் கட்டிடமும், இன்னும் பல. சுமார் ஒன்றரை மணி நேரமாவது நடந்து கொண்டே இருந்திருப்போம். குழந்தைகள் விளையாடும் வகையில் ஆங்காங்கே அவர்களுக்கான விளையாட்டுகளும், வீடியோகேம் விளையாட அரங்கமும் இருந்தது. அந்த இடங்களில் என் மகனும் ஜாலியாக இருந்தான். அப்பாடா என்றிருந்தது. 
ஒருவாறு அதை எல்லாம் கண்டுகளித்த பிறகு, வெளியில் வந்தால், Atomium - பார்ப்பதற்கு வேதியலில் பயின்ற மூலக்கூறுகள் அமைப்புடன் கண்கவரும் வண்ணம் இருந்தது. உள்ளே உணவு விடுதி, பல வியாபார சம்பந்தப்பட்ட அருங்காட்சியகங்கள் இருப்பதாகவும், இரவு நேரத்தில் வண்ண விளக்குகளால் அந்த இடம் ஜொலிக்கும் என்றும் தெரிந்து கொண்டோம். என் மகன், இன்னும் அரைதூக்கத்திலேயே இருந்ததால், பஸ்-ஐ பிடித்துக் கொண்டு ப்ருச்செல்ஸ் நகருக்குள் சென்றோம்.
பஸ்சில் சிறிது நேரம் தூங்கியதால் இறங்கும் நேரத்தில் கொஞ்சம் தெளிந்திருந்தான். இறங்கிய பிறகு, மீண்டும் சிறிது தூர நடை. போனால், பிரமாண்டமான, அழகிய சிலை வேலைப்பாடுகளுடன் பெரிய பெரிய பளிங்கினால் கட்டப்பட்ட கட்டிடங்கள் நகர் முழுவதும். அழகிய வண்ண,வண்ண கண்ணாடி வேலைப்பாடுடன் கூடிய மிகவும் பழமையான கிறிஸ்துவ கோயில்கள். அவைகள் எல்லாம் வெறும் அழகுக்கும், நாட்டைச் சுற்றிப் பார்க்க வருபவர்கள் பார்க்கும் இடமாகவும் ஆகிவிட்டிருக்கிறது. அங்கு வழிபாடுகள் எல்லாம் நடப்பதில்லை. உள்ளே மேரி மாதா, அந்தோனியார், சிலுவையில் அறையப்பட்டு, உயிர் நீத்த ஏசுவின் உருவங்கள் என்று பளிங்கினால் நன்கு செதுக்கிய அழகிய சிலைகள். அண்ணாந்து பார்த்தால் நீண்டு உயர்ந்த சாளரங்கள், அழகிய வேலைப்பாடுகளுடன். மிகவும் பழைய, பிரமாண்டமான வாத்தியக் கருவிகள் என்று பார்வையை கவரும் வகையில் அமைத்திருந்தார்கள். சிறிது நேரம் மௌனமாக அமர்ந்து விட்டு, வெளியில் படியிலேயே இளைப்பாறினோம். நல்ல கூட்டம். அங்கிருந்து மெதுவாக நடை போட்டுக்கொண்டே மற்ற கட்டிடங்களையும் பார்த்தோம். நகரில் எங்கு பார்த்தாலும் சிலை வேலைப்பாடுகளுடன் கூடிய சிமெண்ட் கலரில் கல்கட்டிடங்கள். நிர்வாண சிறுவனின் சிலைகள் எங்கு பார்த்தாலும். அது தான், பெல்ஜியத்தின் அடையாளமாகவும் இருக்கிறது. நகர் நடுவே, செயற்கை நீர் ஊற்றுகள். அதை சுற்றிலும் சிலைகள்.
எல்லா இடங்களைப் பற்றியும் சுதாமன் எங்களுக்கு அருமையான தகவல்களை சொல்லிக் கொண்டே வந்தார். குழந்தைகளுடன் அன்புடன் பழகியதால் அவர்களும் அவருடன் பேசிக் கொண்டே வந்தனர். அவர், ஐரோப்பாவில் பல நாடுகளில் வேலை பார்த்ததால் ஒவ்வொரு நாட்டைப் பற்றியும் நன்கு தெரிந்து வைத்திருந்தார். அவருடைய பெற்றோர்கள் அவரைப் பார்க்க வந்திருந்த பொழுது அவர்கள் சென்று வந்தஇடங்களைப் பற்றியும் பேசிக் கொண்டே வந்ததால் நேரம் போனதே தெரியவில்லை. அங்கிருந்து மீண்டும் ஒரு பேருந்தை பிடித்துக் கொண்டு, Grand Place /Market Square எனும் நகர மையத்திற்குச் சென்றோம்.
Market Square/Grand Place

உள்ளே நுழைய,நுழைய கண்முன் பரந்து விரிந்த கண்கவர் கட்டிடங்கள் நம்மை முழுமையாக ஆக்கிரமிக்கிறது. இது கனவா, இல்லை நனவா என்று நம்மை நாமே கிள்ளத் தோன்றுகிறது. அப்படி ஒரு அழகு, ஒரு நேர்த்தி. ஒவ்வொரு கட்டிடமும் ஒரு அழகு. இந்தியாவிலும் நாம் பல கோவில்களை இப்படி காணலாம். இவர்கள் பழமை மாறாமல் அந்த கட்டிடங்களை அதே நிறத்தில் வைத்துப் பராமரிக்கிறார்கள். சிறிது நேரம் வரை அந்த கனவுலகத்தில் இருந்து விட்டு வெளியில் வந்து ஒவ்வொரு இடங்களை நிதானமாக பார்க்க ஆரம்பித்தோம். எங்கும் சுற்றுலாப் பயணிகள். பெரும்பாலும் குழந்தைகள் இல்லாத கணவன், மனைவி, வயதானவர்கள், காதலர்கள் வெவ்வேறு மொழிகளை பேசிக்கொண்டு.
அமெரிக்காவிலும்,கனடாவிலும் பல நல்ல இடங்களை பார்த்திருந்தாலும், இந்த கனவுப்பிரதேசம் முற்றிலும் வேறுபட்டு இருந்ததால், அதிலிருந்து விடுபட முடியாமல் மனம் தத்தளித்ததென்னவோ உண்மை தான். மிகப் பெரிய வெட்ட வெளி இடம். குப்பை இல்லாத கல் தரைகள். ஒவ்வொரு கட்டிடத்தின் மேல், தாமிரத்தால் வேய்ந்த கோபுரங்கள். அவை பருவநிலை வேறுபாட்டால் வண்ணம் மாறி காப்பர் ப்ளூவாக,கட்டிடத்திற்கு இன்னும் மெருகூட்டி இருந்தது. சிறு சிலைகளுகளின் மேல் அடித்திருந்த தங்கப்பூச்சும் வெயிலில் மின்னிக் கொண்டிருந்தது. 
என் கணவர் கேமராவில் பல இடங்களையும், வளைத்து,வளைத்து எடுத்துக் கொண்டார். அவருக்கு இயல்பாகவே போட்டோ எடுக்கப் பிடிக்கும். அதுவும் இந்த மாதிரி இடங்களை பார்த்தாலோ மிகவும் பரவசமாகி விடுவார். அங்குமிங்கும் அலைந்து கட்டிடங்களை பல கோணங்களில் எடுத்து தள்ளிவிட்டார். அன்று வார இறுதி நாளாததால் எங்கும் கூட்டம். நிறைய உணவகங்கள். நல்ல வெயில். உணவகங்களில் நல்ல  கூட்டம். மக்கள் வெளியே அமர்ந்து திராட்சை ரசம், பாஸ்டா , கறி என்று சாப்பிட்டுக் கொண்டிருந்தார்கள். சிலர் கையில் ஐஸ் கிரீம்,பெல்ஜியன்waffles வைத்து சாப்பிட்டுக் கொண்டே நகர்வலம் வந்து கொண்டிருந்தார்கள். அவர்களை பார்த்து எங்களுக்கும் பசிக்க ஆரம்பித்து விட்டது. பெல்ஜியன்waffles - மிகவும் பிரபலமான உணவு. நம் பாஷையில் சொல்ல வேண்டும் என்றால், அச்சில் வார்த்த இனிப்பு கோதுமை ரொட்டி. அதன் மேல் தேன் மாதிரி maple syrup கொட்டி கொடுப்பார்கள். நன்றாக இனிப்பாக இருக்கும். சிலர், ஐஸ்கிரீமையும் அதன் மேல் போட்டுச் சாப்பிடுவார்கள். ம்ம்ம்ம்ம்ம்ம்ம். சாப்பிட்டுக் கொண்டே இருக்கலாம். அதையும் வாங்கிக் கொண்டு, எல்லோரும் ஐஸ்கிரீமும் வாங்கிக் கொண்டோம். குச்சியில் நறுக்கிய  ஸ்ட்ராபெர்ரி, வாழைப்பழம் என்று மாறி மாறி அழகாக அடுக்கி வைத்திருந்தார்கள். அதை உருகிய சாக்லேட்டில் நனைத்து கொடுக்கிறார்கள். ஐஸ்கிரீமில் கூட போட்டுச் சாப்பிடலாம். சுதாமன் அதை எங்களுக்கு வாங்கி கொடுத்தார். என் மகனும் தூக்கக் கலக்கத்திலிருந்து வெளியே வந்து கொண்டிருந்தான். அவனுக்கு பிடித்த ஐஸ் கிரீமும் சேர்ந்து கொள்ள, சோர்வும் அவனிடமிருந்து மெல்ல சென்றுக் கொண்டிருந்தது.
இப்படியாக மாலை ஐந்து மணி வரை சுற்றிக் கொண்டிருந்தோம். பெல்ஜியம் கண்ணாடி வேலைப்பாடுகளுடன் கூடிய நகைகள், வீட்டுச் சாமான்கள், எம்ப்ராய்டரி வேலைப்பாடுகளுடன் கூடிய திரை சீலைகள், மேசை விரிப்புகள் மிகவும் பிரபலம். நிறைய கடைகளும் அவைகளை எல்லாம் விற்றுக் கொண்டிருந்தன. அதை எல்லாம் விட, பெல்ஜியம் வைரைங்கள் மிகவும் பிரபலம். சிறு வயதில், என் பாட்டி அணிந்திருந்த வைரத்தோடுகள் பெல்ஜியம் வைரங்களால் செய்யப்பட்டது என்று அடிக்கடி அம்மா சொல்லக் கேள்விப் பட்டிருக்கிறேன். 

நிறைய இனிப்பு கடைகளும், அங்கே அதை வாங்க மக்கள் கூட்டமும் அலைமோதிக் கொண்டிருந்தன. இதெல்லாம் நம்மூர் அல்வா, ஜிலேபி, முறுக்கு, பெங்காலி இனிப்புகள்  பக்கத்தில் வருமா என்று எங்களுக்குள் பேசியபடியேவேடிக்கை பார்த்துக் கொண்டிருந்தோம். ஒரு இனிப்பின் பெயர் கூட தெரியவில்லை.அப்படியே, நண்பர் வீட்டுக்கு பயணமானோம். சுதாமன், அவர் ஆங்கிலத்தில் எழுதிய கவிதைப் புத்தகத்தை எங்களுக்கு பரிசாக அளிக்க அவருக்கும், அவருடைய நண்பருக்கும் பல நன்றிகளை தெரிவித்து விட்டு, எங்களுக்குத் தேவையான பெட்டிகளை மட்டும் எடுத்துக் கொண்டு, அவர்களிடமிருந்து விடைபெற்று காரில் Bruges நோக்கிப் பயணமானோம்.





No comments:

Post a Comment