பலநாட்கள் திட்டமிட்டு நடத்தப்பட்ட கொலை இது என்கிறது காவல் துறை. டிசம்பர் 4ந் தேதி யுனைடெட் ஹெல்த்கேரின் தாய் நிறுவனமான 'யுனைடெட் ஹெல்த் குரூப்' தனது வருடாந்திர முதலீட்டாளர் மாநாட்டை ஹில்டன் ஹோட்டலில் நடத்தும் விவரங்களை அறிந்து நவம்பர் 24ந்தேதியே நியூயார்க் வந்திறங்கி இருக்கிறான் 26 வயதான கொலையாளி 'லுய்ஜி மன்ஜோனே'.
அதிகாலையில் மாநாட்டில் கலந்து கொள்ள வந்த 'யுனைடெட் ஹெல்த்கேர்' நிறுவன தலைமை நிர்வாக அதிகாரி பிரையன் தாம்ப்ஸன்ஐ கொன்று விட்டு சர்வசாதாரணமாக அங்கிருந்து தப்பி விட்டிருக்கிறான். காவல்துறையும் ஒன்று விடாமல்அப்பகுதியில் இருந்த பாதுகாப்பு கேமராக்கள் மூலம் அவனைத் தொடர்ந்து சென்றிருக்கிறது.அங்கிருந்து அவன் தப்பி பாஸ்டன், நியூஜெர்ஸி, கனெக்டிகட், ஃபிலடெல்ஃபியா சென்றிருக்கலாம் என்று பின்தொடர்ந்து கடைசியாக, பெனிசில்வேனியா மாநிலத்தில் பிடித்து விட்டனர்.
ஃபெடரல் நீதிமன்றத்தில் குற்றம் நிரூபிக்கப்பட்டால், மன்ஜோனேக்கு மரண தண்டனை விதிக்கப்படலாம். கொலை செய்ய துப்பாக்கியைப் பயன்படுத்தியதற்காக அதிகபட்சமாக மரண தண்டனை அல்லது ஆயுள் தண்டனை. மாநிலம் விட்டு மாநிலம் வந்து செய்த கொலைக்காக அதிகபட்சமாக ஆயுள் தண்டனை. ஒரு வன்முறைக் குற்றத்தைச் செய்ய சைலன்சர் பொருத்தப்பட்ட துப்பாக்கியை பயன்படுத்தியதற்காக 30 ஆண்டுகள் முதல் ஆயுள் வரை சிறைத்தண்டனை விதிக்கப்படும் என்று ஃபெடரல் நீதிமன்றம் குற்றஞ்சாட்டியுள்ளது.
நியூயார்க் மாநில நீதிமன்றம் கொலையாளி மீது 11 வழக்குகளைப் பதிந்துள்ளது.
மன்ஹாட்டன் மாவட்ட வழக்கறிஞர் ஆல்வின் ப்ராக், தாம்சனின் மரணத்தை "அதிர்ச்சியையும், கவனத்தையும், அச்சுறுத்தலையும் ஏற்படுத்தும் வகையில் அமைந்த நன்கு திட்டமிடப்பட்டு இலக்கு வைக்கப்பட்ட கொலை" என்று விவரித்துள்ளார். விசாரணைக்குப் பிறகு, நியூயார்க்கின் தெற்கு மாவட்டத்தின் அமெரிக்க வழக்கறிஞர் எட்வர்ட் கிம் வெளியிட்டுள்ள அறிக்கையில், "மன்ஜோனேனின் கருத்துக்களை நாடு முழுவதும் ஒளிபரப்புவதற்கான ஒரு தவறான முயற்சியில்" தாம்சனை கொன்றதாகக் கூறப்படுகிறது.
தாக்குதலுக்குப் பிறகு, சம்பவ இடத்தில் கிடைத்த துப்பாக்கிக்குண்டு உறைகளில் 'Delay', 'Deny', 'Depose' என்று நிரந்தர மார்க்கரில் எழுதப்பட்ட வார்த்தைகளைப் புலனாய்வாளர்கள் கண்டறிந்தனர். காப்பீட்டுத் துறையினர் பயன்படுத்தும் சொற்றொடரை இந்த வார்த்தைகள் பிரதிபலிக்கின்றன. ஒருவர் மருத்துவ காப்பீடு கேட்டு விண்ணப்பித்தால் முடிந்தவரை தாமதப்படுத்துவது. இல்லையென்றால் கோரிய தொகையை மறுப்பது. அதுவும் முடியவில்லையா விண்ணப்பத்தை முற்றிலும் நிராகரித்து விடுவது. இப்படி செய்து கொண்டே இருந்தால் விண்ணப்பித்தவருக்கு மனஉளைச்சல் ஏற்படும். நாளடைவில் வேறு வழிகளை நாடிச் சென்றுவிடுவார்கள் என்பது காப்பீட்டுத்துறையினர் செய்வது வழக்கம். இதைத்தான் 'Rainmaker' படத்தில் அருமையாக காட்டியிருப்பார்கள்.
சுகாதார காப்பீட்டுத் துறை, குறிப்பாக பணக்கார நிர்வாகிகள் மீது விரோதத்தை வெளிப்படுத்தும் வகையில் கொலையாளி பல குறிப்புகளை எழுதி வைத்திருந்ததாகக் கண்டறியப்பட்டுள்ளது. நல்ல கல்லூரியில் படித்தவன் எப்படி கொலையாளி ஆனான்? இதுபோன்ற வன்முறையில் ஈடுபடுவதற்கு ஒருவரைத் தூண்டும் பல காரணிகள் உள்ளன என்று வடகிழக்குப் பல்கலைக்கழக குற்றவியல் நிபுணர் ஜேம்ஸ் ஆலன் ஃபாக்ஸ் கூறியுள்ளார். அநீதிக்கு எதிரான மனநிலை இப்படிச் செய்யத் தூண்டியிருக்கலாம். யுனைடெட் ஹெல்த்கேர் நிறுவனத்துடன் மன்ஜோனேனுக்கு தனிப்பட்ட முறையீடு இருந்ததா என்பது இன்னும் தெளிவாகத் தெரியவில்லை என்றாலும், காவல்துறையால் பெறப்பட்ட அவரது எழுத்துக்களின் அடிப்படையில், அவர் சுகாதாரத் துறை மீது கருத்தியல் வெறுப்பைக் கொண்டிருந்தார் என்பது தெளிவாகிறது.
அவரது பின்னணியைப் பொறுத்தவரை பணக்கார குடும்பம், ஐவி லீக் கல்வி என கொலை செய்யத் தூண்டும் முகாந்திரம் இல்லாது போனாலும் பலரை வஞ்சிக்கும் ஒரு அமைப்பின் மீதான கோபம் போல் தான் இந்த கொலைவழக்கில் தெரிகிறது. இவர்கள் தங்களை ஒரு ஹீரோவாக பாதிக்கப்பட்டவர்களுக்கு குரல் கொடுப்பவர்களாக நினைத்துக் கொள்வதுண்டு. தற்பொழுது பலராலும் கொலையாளிக்கு ஆதரவு கிடைத்து வருகிறது." என்று ஃபாக்ஸ் கூறியுள்ளார்.
அமெரிக்காவின் சுகாதார காப்பீட்டுத் துறை மீது பல கண்டனங்களும் அதிருப்திகளும் பொதுமக்களுக்கு உண்டு. பெரு நிறுவன முதலைகள் மக்களின் பணத்தை உறிஞ்சி அவர்களுக்குத் தேவையான காப்பீடுகளை வழங்குவதில்லை என்று குற்றச்சாட்டு என்றும் உண்டு. முதல்முறையாக இவ்வாறு ஒரு நிறுவன அதிகாரி கொல்லப்பட்டிருப்பதால் கடுமையான தண்டனை தருவதில் நீதிமன்றமும் முனைப்பாக உள்ளது.
ஆனால் கொலைக்கான மூல காரணத்தை யாராவது அலசி உபாயம் காண்பார்களா?
இல்லை என்பதே அதன் பதிலாக இருக்கும்.
சென்னை மருத்துவமனையில் புற்றுநோயால் பாதிக்கப்பட்ட தன் அம்மாவிற்கு மருத்துவர் சரியான முறையில் மருத்துவம் அளிக்கவில்லை. தன்னையும் இழிவுபடுத்தினார் என்று ஒருவருக்கு கோபம் வந்து மருத்துவரைக் கத்தியால் குத்திய சம்பவம் தான் நினைவிற்கு வந்தது. அதை நியாயப்படுத்த முடியாது. அப்படியொரு நிலைக்குக் கொண்டுச் சென்றவர்கள் தான் உண்மையான குற்றவாளிகள் என்று எப்படிப் புரிய வைப்பது?
முதலாளித்துவத்தை எதிர்ப்பவர்கள் இந்தக் கொலையாளிக்கு ஆதரவாக இருக்கிறார்கள். ஏன் தீவிரவாதியைப் போல நடத்த வேண்டும்? உள்நாட்டுப் பாதுகாப்பு அதிகாரிகளிடம் ஒப்படைக்க வேண்டும்? கொலைக்கான தண்டனையைக் கொடுக்காமல் ஏன் தீவிரமாக ராணுவ விசாரணை என்பதில் இருக்கிறது பெரு நிறுவன முதலாளிகளின் லாபி. இப்படி ஆளாளுக்கு துப்பாக்கியை எடுத்துக் கொண்டு மேலதிகாரிகளைச் சுட ஆரம்பித்தால் என்னாவது? அவர்களுக்கும் பயம் வரத்தானே செய்யும்?
எங்கே, எதனால் இப்படியொரு நிலைமை என்று யார், யாருக்குப் புரியவைப்பது?
மில்லியன் டாலர் கேள்வி!
