சமீப நாட்களாக பிரபலமாகி வரும் எளிமையான அதே நேரத்தில் ஆர்வத்தைத் தூண்டும் வார்த்தை விளையாட்டு "வேர்டில்"(Wordle). நியூயார்க் டைம்ஸ் ஆன்லைன் வலைதளத்தில் இந்த விளையாட்டை விளையாடலாம். தினமும் ஒரு வார்த்தை மட்டுமே விளையாட முடியும். ஐந்து எழுத்துகள் கொண்ட சரியான வார்த்தையைக் கண்டுபிடிக்க ஆறு வாய்ப்புகள் வழங்கப்படுகிறது.
முதலில் ஐந்தெழுத்துக் கொண்ட ஏதாவதொரு வார்த்தையை நாம் டைப் செய்ய வேண்டும். சரியான இடத்தில் சரியான எழுத்து இருந்தால் அது பச்சை நிறத்தில் காட்டப்படும். தவறான இடத்தில் சரியான எழுத்து இருந்தால் மஞ்சள் நிறத்தைக் காட்டும். அன்றைய வார்த்தைக்குச் சம்பந்தம் இல்லாத எழுத்து பழுப்பு நிறத்தில் காட்டப்படும். இது தான் விளையாட்டின் சூட்சுமம். பழுப்பு நிற எழுத்துக்களைத் தவிர்த்து மீதமுள்ள எழுத்துக்களைக் கொண்டு அன்றைய ஐந்தெழுத்து வார்த்தையைக் கண்டுபிடிக்க வேண்டும். ஒரு முறை விளையாடி விட்டால் மீண்டும் மீண்டும் விளையாடத் தூண்டுகிறது. ஏற்கெனவே வார்த்தை விளையாட்டில் ஈடுபாடு கொண்ட என்னைப் போன்றோரைப் பைத்தியமாக்குகிறது. காலையில் எழுந்தவுடன் தேநீர் குடிப்பது போல சரியான வார்த்தைத் தெரியும் வரை மண்டையைப் பிச்சுக்கலாம் போல ஆகிவிட்டது நிலைமை😄
இந்த விளையாட்டைப் போலவே இதன் பின்னணியும் மிகவும் சுவாரசியமானது. இதைக் கண்டுபிடித்தவர் புரூக்ளினில் வசிக்கும் மென்பொருள் பொறியாளரான ஜாஷ் வார்டில். அவருடைய பார்ட்னர் பலக் ஷா, வார்த்தை விளையாட்டுகளை விரும்புவதை அறிந்து இந்த விளையாட்டை அவருக்காக உருவாக்கியிருக்கிறார்💖💗💞 அவர்கள் இருவரும் பல மாதங்களாக விளையாடிய பிறகு அவரது குடும்பத்தினரின் வாட்ஸ்அப் குழுவில் உறவினர்களுக்கு அறிமுகப்படுத்தியவுடன் நல்ல வரவேற்பு கிடைக்க, 2021 அக்டோபரில் அதை உலகம் முழுவதும் வெளியிட்டார். நவ.1ல், 90 பேர் விளையாடினர். இரண்டு மாதங்களுக்குப் பிறகு, 300,000 க்கும் அதிகமான மக்கள் விளையாடினர். ஒரு நாளுக்கு ஒருமுறை நடக்கும் ஐந்தெழுத்து வார்த்தை விளையாட்டுக்கு அதிகபட்சமாக மக்கள் விளையாடியது இந்த விளையாட்டாகத் தான் இருக்க வேண்டும்.
இதில் விளம்பரங்கள், தகவல்களைத் திருடுவது போன்ற தில்லாலங்கடி வேலைகள் ஏதும் கிடையாது. நியூயார்க் டைம்ஸ் பத்திரிகை ஆன்லைனில் மக்கள் விளையாட ஏதுவாக இந்த விளையாட்டை ஜாஷ் வார்டிலிடமிருந்து வாங்கி விட்டது. இன்று ஏராளமானோர் நள்ளிரவு 12 மணிக்கு காத்திருந்து புதிய நாளின் புதிய வார்த்தையைக் கண்டுபிடிக்க துடிக்கும் அளவுக்கு வளர்ந்து விட்டிருக்கிறது.
காதல் பல வகை அதில் இதுவும் ஒரு வகை💖💖💖
வாழ்க ஜாஷ் வார்டில்& பலக் ஷா!
No comments:
Post a Comment